Web Desk 
ഭയത്തെയും മറവിയെയും അകറ്റാനുള്ള ഉപാധിയാണ് വായനയെന്ന് സന്തോഷ് ഒഴിഞ്ഞവളപ്പ് അഭിപ്രായപ്പെട്ടു. മുന്നാട് ഗവ. ഹൈസ്കൂളിൽ വായന മാസാചരണത്തിൻ്റെ ഭാഗമായി നടന്ന കാർട്ടൂൺപ്രദർശനവും പുസ്തക പ്രദർശനവും ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ഓരോ വാക്കിലും ജീവിതവും ചരിത്രവും മാറ്റത്തിന്റെ അടയാളങ്ങളും നിലനില്ക്കുന്നുണ്ട്. നിഘണ്ടുവിലെ വിവരണത്തിനപ്പുറത്താണ് വാക്ക് പ്രവർത്തിക്കുക. വാക്ക്, ഉപയോഗങ്ങളിലൂടെ ഒരു വലിയ കൃതിയാകും. വാക്ക് ലോകത്തോടൊപ്പം ജീവിക്കുന്നു. എന്തിനു വേണ്ടിയാണ് പുസ്തകത്തെക്കുറിച്ച് പലരും വൈകാരികമാകുന്നതും അനേകം പുസ്തകങ്ങൾ വാങ്ങി വീട്ടിൽ ശേഖരിക്കുന്നതും എന്ന് നാം ആലോചിക്കണം. സഹിഷ്ണുതയും സഹാനുഭൂതിയും വളർത്തിയെടുക്കുവാനും വായന പ്രയോജനപ്പെടുമെന്നും അദ്ദേഹം കൂട്ടിച്ചേർത്തു. ചടങ്ങിൽ ഹെഡ്മാസ്റ്റർ ശ്രീ. കെ. രാജൻ മാസ്റ്റർ അധ്യക്ഷത വഹിച്ചു. ആനന്ദകൃഷ്ണൻ എടച്ചേരി സ്വാഗതവും ദൃശ്യ നന്ദിയും പറഞ്ഞു.
