Web Desk 
പരസ്യ മദ്യപാനം തടയാന്‍ശ്രമിച്ച എസ്‌ഐയേയും പോലീസുകാരേയും കയ്യേറ്റം ചെയ്ത രണ്ടുപേരെ ബദിയടുക്ക പോലീസ് അറസ്റ്റുചെയ്തു. ബദിയടുക്ക കാടമന കുണ്ടാള്‍മൂല ഹൗസില്‍ കെ.എം.ഇബ്രാഹിമിന്റെ മകന്‍ കെ.എം.മുഹമ്മദ്ഹനീഫ്(48), ബദിയടുക്ക ചെന്നാര്‍കട്ട ചെമ്പാല്‍തിമര്‍ ഹൗസില്‍ കെ.മുഹമ്മദിന്റെ മകന്‍ കെ.എ.ഇബ്രാഹിംഖലീല്‍(37) എന്നിവരെയാണ് എസ്‌ഐ എന്‍.അന്‍സാറും സംഘവും അറസ്റ്റുചെയ്തത്.
ഇന്നലെ വൈകീട്ട് 5 മണിയോടെ ബേള ധര്‍മ്മത്തടുക്കയില്‍ റോഡരികില്‍ കാറിൽവെച്ച് പരസ്യമായി മദ്യപിക്കുന്നത് ചോദിച്ചപ്പോഴാണ് ഇവര്‍ എസ്‌ഐയോടും സംഘത്തോടും തര്‍ക്കിക്കുകയും എസ്‌ഐയുടെ കൈപിടിച്ച് വലിക്കുകയും കൂടെ ഉണ്ടായിരുന്ന സിവില്‍ പോലീസ് ഓഫീസര്‍ ആരിഫിനെ പിടിച്ചുതള്ളുകയും ചെയ്തത്. പിന്നീട് ഇവരെ പോലീസ് വാഹനത്തില്‍ കയറ്റാന്‍ശ്രമിച്ചപ്പോള്‍ തടയാന്‍ശ്രമിക്കുകയും ചെയ്തു. പിന്നീട് ബലം പ്രയോഗിച്ചാണ് ഇവരെ അറസ്റ്റുചെയ്തത്. ഇവര്‍ മദ്യപിച്ചുകൊണ്ടിരുന്ന കെഎല്‍ 59 ആര്‍ 7436 നമ്പര്‍ കാറും കസ്റ്റഡിയിലെടുത്തു.
