മഞ്ചേശ്വരത്ത് ട്രെയിനിനു നേരെ കല്ലേറ്; പെൺകുട്ടിക്ക് പരിക്ക്

മംഗളൂരു സെൻട്രൽ- ചെന്നൈ എക്സ്പ്രസ്സ് ട്രെയിനിനു നേരെ കല്ലേറ്. പെൺകുട്ടിക്ക് പരിക്കേറ്റു. മംഗളൂരു ബൈകംപാടിയിലെ അഫ്രീനയ്ക്കാണ് പരിക്കേറ്റത്. വെള്ളിയാഴ്ച ഉച്ചയ്ക്ക് 2:30 ഓടെയാണ് സംഭവം. മഞ്ചേശ്വരം പോലീസ് സ്റ്റേഷൻ പരിധിയിലെ പോസോട്ടിലാണ് സംഭവം. കുടുംബത്തോടൊപ്പം മലപ്പുറത്തേക്ക് യാത്ര ചെയ്യുന്നതിനിടയാണ് അഫ്രീനയ്ക്ക് പരിക്കേറ്റത്.

വിവരമറിഞ്ഞെത്തിയ കാസർഗോഡ് റെയിൽവേ പോലീസ് എസ് ഐ സനൽകുമാർ,മംഗളൂരു ആർപിഎഫ് എ എസ് ഐ പ്രമോദ്, അജിത്ത് തുടങ്ങിയവരുടെ നേതൃത്വത്തിലുള്ള പോലീസ് സംഘം അന്വേഷണം നടത്തി. അക്രമികളെ കുറിച്ച് വിവരം ലഭ്യമായിട്ടില്ല. പ്രദേശവാസികൾക്ക് ഇത്തരം സംഭവങ്ങളുടെ ഗൗരവത്തെക്കുറിച്ച് പോലീസ് സംഘം ബോധവത്കരണം നടത്തി. പെട്രോളിങ് ശക്തമാക്കാനും പോലീസ് തീരുമാനിച്ചിട്ടുണ്ട്.