ജീവന്റെ വിതയാണ് കവിത – ഡോ: സോമൻ കടലൂർ

ജീവിത നൈരന്തര്യങ്ങളുടെ ശരിയെഴുത്താണ് കവിതയെന്ന് പ്രമുഖ എഴുത്തുകാരനും പ്രഭാഷകനുമായ ഡോ: സോമൻ കടലൂർ അഭിപ്രായപ്പെട്ടു. നിലാവ് കൂട്ടായ്മ സംഘടിപ്പിച്ച ചീമേനി ഗവ: ഹയർ സെക്കന്ററി സ്കൂളിലെ ഒന്നാം വർഷ ഹയർ സെക്കന്ററി വിദ്യാർത്ഥി കൊടക്കാട് പൊള്ളപ്പൊയിലിലെ ദേവാനന്ദ് എമ്മിന്റെ ഓർമ്മകൾക്ക് ഒരാമുഖം എന്ന കവിതാ സമാഹാരം പ്രകാശനം ചെയ്ത് സംസാരിക്കുകയായിരുന്നു അദ്ദേഹം. കവിത മലയാളത്തിൽ ഇന്ന് സജീവമാണ് – സമ്പന്നവുമാണ്. പുതിയ എഴുത്തുകാർ കവിതയെ വസന്തത്തിന്റെ ഒരു പൂക്കാലമാക്കി മാറ്റുന്നു എന്നതും ശ്രദ്ധേയമാണ് എന്നും അദ്ദേഹം കൂട്ടിച്ചേർത്തു.സാംസ്കാരിക-മാധ്യമ പ്രവർത്തകനായ വിനോദ് ആലന്തട്ട അധ്യക്ഷത വഹിച്ചു. ചെറുവത്തൂർഹൈലാന്റ് പ്ലാസ ഓഡിറ്റോറിയത്തിൽ വെച്ച് നടന്ന ചടങ്ങിലാണ് പ്രശസ്ത കവിയും നോവലിസ്റ്റുമായ ഡോ: സോമൻ കടലൂർ പ്രകാശനം നിർവ്വഹിച്ചത്. കവിയും സാസ്കാരിക പ്രവർത്തകനുമായ സി എം വിനയചന്ദ്രൻ ആദ്യ പ്രതി ഏറ്റുവാങ്ങി. പ്രമുഖ പ്രഭാഷകൻ ഡോ:വത്സൻ പിലിക്കോട് പുസ്തകം പരിചയപ്പെടുത്തി. കെ ടി വി നാരായണൻ മാസ്റ്റർ, പ്രദീപ് കൊടക്കാട്, അനിൽ നീലാംബരി,
വിജേഷ് കാരി, രാഗേഷ് മാസ്റ്റർ, സുപ്രഭ ടീച്ചർ, പ്രവീൺ പ്രകാശ് എന്നിവർ സംസാരിച്ചു. കവി ദേവാനന്ദ് മറുമൊഴി ഭാഷണം നടത്തി. ഡോ : മഹേഷ് വിവി സ്വാഗതവും മധു പ്രതിയത്ത് നന്ദിയും പറഞ്ഞു.